Scríbneoir as Úibh Fhailí ceaptha mar Oifigeach Forbartha Gaeilge ag an gCumann Gaelach na hEaglaise

Tá an-áthas ar Chumann Gaelach na hEaglaise a fhógairt go bhfuil an Dr Rita Kelly ceaptha mar Oifigeach Forbartha Gaeilge ag an gCumann. Beidh aithne is cur amach ag a lán daoine uirthi mar is file agus scríbhneoir dátheangach í le fada an lá. Tá sí páirteach i ngluaiseachtaí áirithe na Gaeilge leis na blianta.

Bhí sí pósta le hEoghan Ó Tuairisc (1919-1982), scríbhneoir mór le rá i saol na hÉireann.

Ó 2015, tá sí pósta le Edel Connolly, iar-phríomhoide meánscoile.

Is Gaillimheach í Rita ó dhúchas, baineann sí go mór mór le hOirthear na Gaillimhe. Chaith sí tamall ag cur fúithi sa Ghearmáin, in Manhattan, i bPort Láirge agus cois Bearbha gar do Cheatharlach agus áiteanna eile nach iad.

Is i mBiorra, Co. Uíbh Fhailí atá sí lonnaithe faoi láthair, rud a bhíonn iontach áisiúil di chun taisteal go gach cearn den tír mar beidh Rita ag feidhmiú ar fud na tíre, ó Thuaidh agus ó Dheas, i measc an phobail agus eagrais na hEaglaise leis an nGaeilge a chur chun cinn. Tá an-áthas uirthi go bhfuil an tír ar fad faoina cúram aici sna cúrsaí seo.

Bíonn Rita an-ghníomhach ina paróiste féin i mBiorra, agus cháiligh sí ní ba luaithe sa bhliain mar Léitheoir Tuata; is comhalta de Rogh-Bheistrí Bhiorra í chomh maith. Cuireann sé ríméad uirthi glactha leis an bpost seo. Tugann an post seo deis di daoine a chur in aithne dá chéile, daoine ag a bhfuil togha na Gaeilge acu agus a bhaineann le hEaglais na hÉireann ó thus, ach nach bhfaigheann deis i gcónaí a gcuid Gaeilge a labhairt ná a gcreideamh a chleachtadh trí mhéan na Gaeilge.

Aithníonn Rita, mar aon leis an gCumann, an méid oibre atá deánta ag Caroline Nolan, a bhí sa phost roimpi go dtí le deanaí (2011-2022).

Bunaíodh Cumann Gaelach na hEaglaise sa bhliain 1914 (1) chun meon na Seaneaglaise Ceiltí a choimeád beo in Eaglais na hÉireann agus na baill den Eaglais a chuireann spéis sa Ghaelachas a bhailiú le chéile, (2) úsáid na Gaeilge a leathnú san Eaglais, (3) iomainn agus ábhar diaga eile a bhailiú ó litríocht na Gaeilge agus (4) ceol agus ealaíon Éireannach a chur ar aghaidh in imeachtaí na hEaglaise.

Eagraíonn an Cumann seirbhísí rialta in áiteanna éagsúla ar fud na tíre ó am go ham, agus tacaíonn sé leo - mar shampla, Lá Fhéile Bríde, Lá Fhéile Pádraig agus féilte eile. Tacaíonn Cumann Gaelach na hEaglaise le seirbhísí Gaeilge in Ardteampall Chríost, in Ardteampall Naomh Pádraig, Baile Átha Cliath; Ardteampeall Fhionnbarra i gCorcaigh, Ardteampeall Chríost i bPort Láirge. Anois, tar éis na pandéime tá súil ag an gCumann an tacaíocht chéanna a chur ar fáil do pharóistí ar fud na tíre chun Seirbhísí Gaeilge a chothú.

Tá an post seo á mhaoiniú ag Foras na Gaeilge. Tá súil ag Rita go rachaidh daoine i dteagmháil léi chun cibé cabhair is féidir léi nó leis an gCumann a chur ar fáil dóibh siúd a bhfuil fonn orthu úsáid na teanga a leathnú i measc phobal na hEaglaise.

Teagmháil: [email protected]

Teil: 087 6728974